ನಿನ್ನ ಹೊರತಾಗಿ.. !!

ರಾಣಿಯಾಗುವ ಬಯಕೆಯಿಲ್ಲ

ನಿನ್ನ ಹೃದಯ ಸಿಂಹಾಸನವೇ

ನನ್ನದಾಗಿರುವಾಗ

ಸಿರಿ ಸಂಪತ್ತಿನಲ್ಲಿ

ಮೀಯುವ ಆಸೆಯಿಲ್ಲ

ಸುರಿವ ಸೋನೆಯ ಜೊತೆ

ನೀನಿರುವಾಗ

ಜಗತ್ತಿನ ಎಲ್ಲಾ ಸುಖ

ನನ್ನದಾಗಿರಬೇಕೆಂಬ ಮಂಪರಿಲ್ಲ

ಬೇಸರದ ಸಂಜೆಗಳಿಗೆ

ನಿನ್ನ ಹೆಗಲಿರುವಾಗ

ಅನುಕ್ಷಣವೂ ನಿನ್ನ ಸಾಂಗತ್ಯ ಬೇಕಿಲ್ಲ

ಸಂಜೆ ಮಬ್ಬಲ್ಲಿ ಕಿರುಬೆರಳಿಡಿದು

ನೀ ನಡೆಸುವಾಗ

ಸುಂದರನಾದ ಸಂಗಾತಿಯ

ಕನವರಿಕೆ ಕನಸುಗಳಿಲ್ಲ

ಕಡು ಮೈಯ ತಿಳಿ ಮನದ

ನಿನ್ನ ನಾ ಪಡೆದಿರುವಾಗ

ಕಣ್ಣಲ್ಲಿ ಕಣ್ಣಿಟ್ಟು ಕಾಪಾಡುವ

ನಾಯಕನ ಪಡೆವ ಹಂಬಲವಿಲ್ಲ

ಕಣ್ಣಲ್ಲಿ ಕನಸಿಡುವ

ಕನಸುಗಾರ ಜೊತೆಯಿರುವಾಗ

ಸೂರ್ಯಪ್ರಭೆಯೆ ಹೊತ್ತಿಹೆನೆಂಬ

ಹಮ್ಮಿನ ಗಂಡಸಿನ ದಾಹವಿಲ್ಲ

ರಾತ್ರಿಯ ಮಡಿಲಿಗೆ ತಣ್ಣಗಿನ

ಬೆಳದಿಂಗಳ ಸುರಿವ ಚಂದಿರ ನನ್ನೊಳಿರುವಾಗ

ನನ್ನವ ಅಷ್ಟೆಲ್ಲಾ ಆಗಿಬಿಡಬೇಕೆಂಬ

ಸುಳ್ಳು ಕನಸುಗಳಿಲ್ಲ

ಇಷ್ಟೇ ಇಷ್ಟಾಗಿ ಇಷ್ಟವಾಗಿ

ನನ್ನೊಳಗೆ ನೀ ಇಳಿದಿರುವಾಗ..